1楼almading
(...)
发表于 2010-7-22 20:58
显示全部帖子
地铁惊魂!
今朝上半天10点半左右,本宁乘额地铁两号线慢慢叫停了人民广场站头郎厢,地铁额门开了,但是站台郎厢额保护门么开,阿拉要下车额宁就候了敞开地铁门口,大约等了靠10秒钟,站台门“哗”一记头开了,第一个宁下去了,就了嗨我一只脚跨到站台郎厢额辰光,地铁门猛额一记关起来了,车厢里额宁才惊叫起来,我后头几个宁快点拿我七手八脚额拉进车厢,我当时勿晓得是吓的木特了还是特别冷静,一句闲话阿么刚,照道理么要谢谢宁嘎勿刚是救命之恩么也是救我勿断手断脚之恩。就听见旁边一个阿姨一直了刚:吓色我了吓色我了。格辰光地铁门又打开了,就看见旁边额阿姨宁一躬,脚一伸以刘翔跨栏额姿态跳出地铁,大有投奔自由额感觉。我随之出门,格辰光再感到手臂补有眼痛,一看有一道清晰额红中泛紫额伤痕,想到前不久发生额惨案心有余悸,了目睹事体发生额站台工作人员指引下,来到了站长室,出来额工作人员态度老诚恳额,一直了赔礼道歉并叫我去验伤,刚:如果有啥问题伊拉全额报销。各么我刚:最主要是上趟刚刚发生了事体,想想拿应该特别注意格方面额问题,今朝如果轧着额是老弱病,就可能勿是赔礼道歉额事体了,我么啥就勿寻拿了。相互留了电话我就走了。回头朋友问我:各么就算侬去验伤,是勿是侬验出来么问题伊拉就不给报销了?哎闹,格我倒么问过。
我宁为哦,格事体是因为地铁门跟站台门勿是同步开启或者两扇门先后开启额辰光么算好,阿拉泱泱大国嘎许多人才卫星航母才造的出,地铁嘎小只生活弄勿利起啊?!.