到啥地方寻有老底子味道额上海小吃？

昨涅，到城隍庙去了。我是奔了松云楼额虾仁小馄饨跟冰冻糯米绿豆汤去额。
蓝天白云天气交关好，虽然涅了点但是心向蛮好，乘了10号线来到豫园站下车，从河南路福佑路口子出去，哦哟！格宁噢是多的来，通道里一边是排队买票，一边还有坐了地朗厢休息额宁（搞勿懂做啥坐了地朗厢），要出去额宁只好轧了出去，心想要命来，像火车站样额，回去勿走格的了。
  进了城隍庙到处才是宁，特别是南翔小笼馒头店排队买小笼额宁排了老长额队，旁边还有立了嗨切额宁，一个外国宁索嘎难小笼摆了垃圾桶朗厢切！ 拨开了宁群到了松云楼门口，朝店里一看，还好还有位子坐，到账台要买冰冻糯米绿豆汤，开票小姐刚不做了，咦？格是那屋里额特色勿做了？好心向立时大减。就卖了小馄饨跟鸡鸭血汤，东西老快上来了，想必老早烧好了嗨额。
  结果，上来额小馄饨像面疙瘩样额全没有咸鲜之味，鸡鸭血汤里额血像盐卤里盐出来额咸得来额要命！价钱又不便宜，这一碗清汤寡水又咸色宁额鸡鸭血糖要10块昂里。再看店里厢额工作宁员才是小青，难怪特色失传味道搭僵！当下推开饭碗去寻其他好切额，兜来兜气每家切额店门口全是面脱蟹咯臭豆腐烧烤等，千篇一律！难道格就是号称好代表上海小吃额城隍庙啊？！
   侬看宁嘎台湾香港日本还有近额成都小吃多少富有地方特色风味不失流传，夜市面开的红红火火额；再看上海，除特打游击额小摊子就基本朗厢寻勿到小吃夜市了。到啥地方能再寻到我想吃额老底子额上海小吃呢？

[ 本帖最后由 almading 于 2010-8-9 12:51 编辑 ].